Stagioni a Sant'Antonio
di Danilo Toneatto
Ecco tre poesie scritte dal prof. Danilo Toneatto di Talmassons
con alcune immagini delle sue splendide NINFEE.
Jugn (Giugno)
'Ne bave di ajarin
ripasse za a matine
il rôs da lis cjariesis
tal folt dai cjaresârs.
Va sù gajart in cîl
soreli ch'al centene.
Cjoche di lûs la lodule
'e cjante tal seren,
'e cjale di lassù
a madurî il forment
jentfri da l'arbe verde.
Luj (Luglio)
E cjante ogni tant qualche ciàne
ta l'afe sul plui biel misdì.
Stan dutis lis bestis in polse,
in ricès sot ne frascje tal fresc.
Tal caligo il soreli al centène,
san di polvar li stradis di cjamps.
No si mouf, no si plee une fuee
dut 'l è fêr, epur bol la vite
daûr mascaris fermis platade.
Avost (Agosto)
Un lamp spalanche la gnot
su nui rabiôs di timpieste.
Rodolin i tons pe campagne
cun sclops di cjocis spacadis.
E l'aiar burlaç al scivile
pleant ta la sbave i ramaçs.
Di colp a plombe la ploe
cun spissul di streciariis.
A bevin i cjamps e lis plantis
cun mil e mil bocjs platadis.
Si studin planc planc i rumors...,
za strache a duar la campagne.
Tra pôc in tun cîl plui seren
tornaran a piâsi lis stelis.